នាព្រឹកថ្ងៃទី១៦ ខែមិថុនា ឆ្នាំ២០២៣ គណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃព្រឹទ្ធសភា (គណៈកម្មការទី៥) ដឹកនាំដោយលោកជំទាវកិត្តិនីតិកោសលបណ្ឌិត ទី បូរ៉ាស៊ី ប្រធានគណៈកម្មការ បានអញ្ជើញជួបពិភាក្សាការងារជាមួយនឹងអាជ្ញាធរប្រចាំការនៅច្រកទ្វារកំពង់ផែអន្តរជាតិភ្នំពេញ ស្ថិតក្នុងភូមិដីឥដ្ឋកោះផុស ឃុំដីឥដ្ឋ ស្រុកកៀនស្វាយ ខេត្តកណ្តាល។
ជំនួបពិភាក្សានេះ ដើម្បីឈ្វេងយល់និងប្រមូលព័ត៌មានឲ្យកាន់តែស៊ីជម្រៅអំពីវិស័យជាសមត្ថកិច្ចរបស់ខ្លួន ផ្អែកលើមុខងារនីតិកម្ម មុខងារតាមដានការអនុវត្តន៍ច្បាប់ និងមុខងារតំណាង ការបង្កើនទំនាក់ទំនងជិតស្និទ្ធរវាងគណៈកម្មការកិច្ចការបរទេស សហប្រតិបត្តិការអន្តរជាតិឃោសនាការ និងព័ត៌មាននៃព្រឹទ្ធសភា ជាមួយប៉ុស្តិ៍នគរបាលច្រកទ្វារកំពង់ផែអន្តរជាតិភ្នំពេញ អំពីសកម្មភាពភ្ញៀងចេញ-ចូល ការដឹកជញ្ជូនទំនិញចេញ-ចូល នៅច្រកទ្វារកំពង់ផែអន្តរជាតិភ្នំពេញ និងការអនុវត្តច្បាប់អន្តោប្រវេសន៍។
